Gripla XXXII

Gripla 32 er alþjóðlegt ISI-tímarit Árnastofnunar með 11 ritrýndum greinum. Í þessu hefti er m.a. fjallað um Esóp á Íslandi, erlendan uppruna tónlistar í íslensku handriti, sögurnar af Hrómundi Greipssyni, heimildir Íslendingabókar og handrit Jónsbókar en af einstökum greinum má nefna að Bjarni Gunnar Ásgeirsson skrifar um tvíblöðung sem hann fann í British Library og reyndist vera úr Reynistaðarbók í Árnasafni – þaðan sem Grímur Thorkelín tók blöðunginn á 18. öld og hafði með sér til Englands; Daniel Sloughter gefur út norræna þýðingu á kvæði um reikningslist frá fyrri hluta 13. aldar; Pernille Ellyton skrifar um fornaldarsögur af Hrafnistumönnum, ólíkar sögur sem tengjast þó blóðböndum í gegnum helstu karlpersónur sínar; Þórunn Sigurðardóttir gefur út kveðskap sem hún færir rök fyrir að sé úr áður óþekktu ljóðabréfi séra Einars Sigurðssonar í Eydölum (um 1538–1626) og Katelin Marit Parsons finnur alþjóðlega flökkusögn í Skarðsárannál, sem hefur hingað til verið álitin sannsöguleg. Gripla kemur út einu sinni á ári og er í opnu aðgengi á gripla.arnastofnun.is Ritstjórar eru Gísli Sigurðsson og Annette Lassen.